གླུ་གཞས།

                                       ལོ་ངོ་༢༥ འཁོར་བའི་དུས་སྟོན་སློབ་གྲྭའི་བསྟོད་གླུ།

མཐོ་རིམ་སློབ་གྲྭའི་མཐོང་སྣང་།

༆རང་འབྱུང་འཐོན་བསྐྱེད་མཐོ་རིམ་སློབ་གྲྭ་འདི།། ཤར་རི་དར་བརྒྱད་ལུང་པའི་སྲོག་ཤིང་ཨིན།།

  མཛེས་པའི་ཤིང་དང་མེ་ཏོག་རྭ་བས་བསྐོར།། གསུང་སྙན་དཀྱིལཝ་སི་གླུ་དབྱངས་འཁྲབ་སྟེ་ཡོད།།

  མཛེས་བྱ་འགྲན་ཟླ་མེད་པ་ལྷ་ཡུལ་བཟུམ།། ལུང་པར་དཀོན་པའི་མཐོ་རིམ་སློབ་གྲྭ་ཨིན།།

  
  

ཚེ་སྔོན་ཚོགས་བསགས་ལས་འཕྲོག་མ་རྫོགསཔ་ལས།། ཧིང་ལས་དམ་ཚིག་ཆེ་བའི་ཆ་རོགས་དང་།།

 ཐུགས་ལ་བྱམས་བརྩེ་ལྡན་པའི་སློབ་དཔོན་རྣམས།། མི་ཚེ་དོན་དག་བཟོ་བའི་མཐའ་དོན་ལུ།།

    ད་རིས་མཐོ་རིམ་སློབ་གྲྭ་འདི་ནང་འཛོམས།། ཤེས་ཡོན་སྣ་ཚོགསའི་སྦྲང་རྩི་ལེན་ཏེ་ཡོད།། 

 
  མཐར་ཐུག་མཁས་པ་སློབ་ཕྲུག་མཐར་ཕྱིན་མཛད།། འབྲས་བུ་ཞི་གཡོག་མཐོ་བའི་གོ་གནས་བཞེས།།

  རྒྱལ་ཁམས་དབུལ་ཕོངས་དཀའ་ངལ་སེལ་ཐབས་ལུ།། འཚོ་བ་སོ་ནམ་འཐོན་བསྐྱེད་གོང་འཕེལ་དང་།།

  སྒོ་ནོར་འཐོན་ཤུགས་ཡར་རྒྱས་བཏང་སྟེ་གིས།། མི་ནགཔ་ཉམ་ཆུང་དཀའ་ངལ་སེལ་བཞིན་ཡོད།།

 

  རང་བཞིན་གནས་སྟངས་འཛིན་སྐྱོང་འཐབ་ནི་འདི།། རྩ་ཁྲིམས་ཆེན་མོའི་ཐུགས་ཀྱི་དགོངས་དོན་ཨིན།།

  བག་ཕེབས་རི་དྲྭགས་སྲོག་ཆགས་སྲུང་སྐྱོབ་ཚུ།། གླིང་འཛིན་འགོ་དཔོན་ཚུ་གིས་འཐབ་སྟེ་ཡོད།།

  ཕྱུག་པའི་རང་བཞིན་ཧོན་མོར་གནོད་རྐྱེན་མེད་།། མི་སྡེ་དཔལ་འབྱོར་གོང་འཕེལ་རྒྱས་བཞིན་ཡོད་།།

 
  དེང་སང་འཛམ་གླིང་གོང་འཕེལ་མགྱོགས་དྲག་ལས་།། གནམ་གཤིས་འགྱུར་བའི་ཚ་དྲོད་འཇིགས་པ་འཐོན།།

  མི་སྡེ་རང་བཞིན་གནོད་པའི་རྐྱེན་ངན་འབྱུང་།། ཚེ་སྲོག་གནོད་པའི་ནད་གཞི་ཡར་འཕེལཝ་མས།། 

  དེ་ཚུ་དཀའ་ངལ་གདོང་ལེན་ཐབས་ནི་ལུ།། ཡུན་བརྟན་གོང་འཕེལ་སྦྱོང་བརྡར་བྱིན་ཏེ་ཡོད།།

 

   ས་གཤིས་འགྱུར་བའི་ཟློག་ཐབས་འགན་ཁུར་འདི།། སློབ་སྦྱོང་འབད་མི་ཕོ་མོའི་ཁས་བླངས་ཨིན།།

  ད་རིས་ལོང་སྤྱོད་འབད་མི་ཐུན་རྐྱེན་ཚུ།། མ་འོངས་བུ་གཞི་ཕན་ཐབས་བདག་འཛིན་འབད།།

  ཡུན་བརྟན་གོང་འཕེལ་དམིགས་དོན་བསྒྲུབས་ཏེ་གིས།། རྒྱལ་ཡོངས་དགའ་སྐྱིད་དཔལ་འཛོམས་འབྱུང་པར་ཤོག།

 

  རྟགས་དང་རྟེན་འབྲེལ་ལེགས་པ་སློབ་གྲྭ་ནང་།། མི་ལོ་ཉེར་ལྔའི་དུས་སྟོན་བརྩི་སྲུང་ཞུ།།

  ང་བཅས་ཕྱག་དང་མཆོད་པའི་སྨོན་ལམ་བཏབ།། མཐོ་རིམ་སློབ་གྲྭ་བསྐལ་བརྒྱའི་བར་དུ་གནས།།

  ཤེས་རིག་ཡོན་ཏན་གོང་དུ་འཕེལ་བར་ཤོག། དགའ་སྐྱིད་ཕུན་སུམ་ཉི་མ་ཤར་བར་ཤོག། །། 

བཟོད་གསོལ༔ གླུ་གཞས་རྩོམ་སྒྲིག་འབད་ནི་ནང་ ཐོས་བསམ་སྒོམ་གསུམ་སོགས་གང་ཡང་མེདཔ་ལས་ མཁས་པ་དགྱེས་པའི་ 

སྙན་ཚིག་དང་ སྡེབས་སྦྱོར་ཁུངས་གཏུགས་མེད་རུང་ ང་རང་གི་ཐོས་བསམ་དང་ཉམས་མྱོང་ཆུང་ཀུ་ལས་ ཟིན་བྲིས་འབད་འབདཝ་ཨིན།

འདི་ནང་ལུ་ བརྫོད་ཚིག་མ་དགཔ་ཡིག་སྡེབས་མ་སྒྲིག་པའི་ ནོར་འཁྲུལ་ལེ་ཤ་ཡོད་སྲིདཔ་ལས་ གཟིགས་མི་ཡོངས་ལུ་ 

ཐུགས་ཀྱི་བཟོད་པ་བཞེས་གནང་ཞུ།

                         

                         བཀའ་དྲིན་ཆེ།